Is-Sur Patrick Vella nħatar Kap tal-Uffiċċju Konġunt f’Marzu 2023 bi ftehim bejn il-Gvern ta’ Malta u s-Santa Sede. Huwa studja t-Terapija tal-Komunikazzjoni fl-Università ta’ Malta minn fejn iggradwa fl-1999 bħala Patologu tat-Taħdit u l-Lingwa. Huwa kompla bl-istudji tiegħu fil-ġerjatrija u l-ġerontoloġija, u sussegwentement kiseb lawrja Master’s fil-Ġestjoni tas-Servizzi tas-Saħħa.
Qabel ma nħatar fl-Uffiċċju Konġunt, Patrick beda l-karriera professjonali tiegħu bħala Patologu tat-Taħdit u l-Lingwa u serva f’oqsma differenti li jinkludu l-kura ġerjatrika u r-rijabilitazzjoni. Fl-2014 huwa nħatar Direttur għall-Anzjanità Attiva u l-Kura fil-Komunità fejn assuma r-responsabbiltà għall-implimentazzjoni tal-istrateġija tal-gvern għall-anzjanità attiva, u għall-iżvilupp u l-provvediment ta’ servizzi ta’ kura residenzjali u fil-komunità għal persuni aktar anzjani. Il-karriera fil-kura ta’ persuni aktar anzjani kompliet fis-settur privat fejn mexxa LyonsCare bħala CEO bejn l-2019 u l-2020.
Fl-2020, huwa ngħaqad mat-tim tal-COVID-19 biex jipprovdi s-servizzi tiegħu lis-Servizz Nazzjonali tas-Saħħa billi żviluppa u ħaddem iċ-ċentru tat-trasport. Fl-2021, inħatar CEO ta’ Social Projects Management Ltd, li pprovdiet punt uniku ta’ servizz għal entitajiet tal-Gvern li kienu jeħtieġu għajnuna fi proġetti infrastrutturali.
Bil-ħatra l-ġdida fl-Uffiċċju Konġunt, is-Sur Vella għandu l-intenzjoni li juża l-esperjenza, l-impenn u l-entużjażmu fuq xogħlu, u flimkien mad-dedikazzjoni u l-ħila tat-tim tekniku tal-Uffiċċju Konġunt, huwa għamel impenn li jistinka biex isseħħ l-implimentazzjoni sħiħa tal-Att dwar Proprjetà ta’ Entijiet Ekklesjastiċi.
